سما خاندان جي گمنام شهزاديءَ جو مقبرو (ماڳ): هي گمنام مقبرو، مڪليءَ تي، ضلعي ٺٽي ۾، ملڪ راڄپال جي مقبري جي ڏکڻ-اوڀر طرف هلڪي پوٺي تي آهي. ان پوٺي جي هڪ ڀاڱي تي مبارڪ خان عرف دولهه دريا خان جي مدفن ڀرسان هڪ قبي واري عمارت سرن جي اڏيل آهي. عمارت رٿ ۾ چورس ۽ هر پاسي 20 فوٽ 7 انچ آهي. ٽن پاسن اتر، ڏکڻ ۽ اوڀر ۾ لنگهه اٿس، جيڪي ونگن سان آهن. اولهه طرف هڪ سارو محراب ٺهيل آهي. ڀتيون گچ سان لنبيل آهن. اندرئين پاسي ڪنڊون پاڻ ۾ بيهڪ جي لحاظ کان چڱي جوڙجڪ ڏيکارين ٿيون. اندر چيرولي جي پٿر مان ٺهيل هڪ قبر آهي، پر اها ٽٽي پئي آهي. ان جا ٽڪرا مقبري جي ٻاهران رکيل آهن. مقبرو خسته حال آهي، مقبري جا ڪجهه حصا به ٽڙيل پکڙيل آهن.